ABIY AXMED OO AF LABADII DHAWAAQAYA
Ra’isal wasaaraha dalka Itoobiya Abiy Axmed oo maanta lahadlayay baarlamaanka dalka ayaa sheegay inuu dalku imtixaan adag ku jiro. Abiy ayaa yidhi mar uu dhanka doorashada ka hadlayay “Karoonaha kahor Xisbiga Barwaaqo doorasho ayuu diyaar u ahaa, balse markii dib loo dhigay ayay kuwii asalkoodu iska mucaaradka ahaa oon ogolaadeen haddii la qaban lahaa doorashada ayaa hadana qaylinaya.”
Abiy ayaa sheegay inay dadka qaar leeyihiin Oromo kama dhalanin, wuxuu sidoo kale sheegay in si lamid ah Obama lagu yidhi Maraykanka muusan udhalanin.
“Hadaan noqon waayo oromo midka igu xigana Oromo ma aha unbay odhanayaan” ayuu yidhi Abiy.
Dalka Itoobiya ayuu ilaa hada dilkii Haacaalu Hundessaa internetku ka go’anyahay kadib markii kacdoon lama filaan ahi ka dhashay dilkii Haacaaluu oo dhacay 29kii June.
Hay’adaha Amnesty International iyo Human Rights Watch ayaa walaac badan ka muujiyay internetka ilaa hadda go’an.
Oromada dalka dibadiisa kunool ayaa dibadbaxyo balaadhan kawada Waqooyiga America iyo dalalka Yurub. Waxaana dibad baxyadooda kusoo biiray qaybo kamid ah qoomiyadaha kale sida Qoomiyada Tigray iyo Soomaalida.
Dibad baxayaasha ayaa dalbanaya inuu Haacaalu cadaalad helo, sidoo kalena lasii daayo Jawar Maxamed iyo siyaasiyiinta kale ee xidhan.
Waxay sidoo kale ku dhawaaqayaan “Abiy waa inuu tagaa”. Dhanka gudaha dalka ayaan ilaa hada la ogaan karin siday xaaladu tahay, maxaa yeelay waxaa wali go’an internetka oo sahli lahaa in la ogaado xaalada dhabta ah ee dalku ku suganyahay. Dibad-baxayaasha Oromo ee dalka Norway ayaa dacwad kadhan ah Abiy u gudbiyay qolodii Abiy siisay Billadii Nabada 2019.
Dajane Dafa oo kamid ahaa xisbiga OFC ayaa gurigiisa xalay lagala baxay sida ay sheegtay xaaskiisa Asalfej oo khadka telefonka ugu warantay TVga OMN. Xaaska Dajane ayaa sheegtay inay ciidanku saqbadhkii uyimaadeen, ayna ka codsadeen ilaa waabariga inay sugaan wayna ka aqbaleen oo 5:00 subaxnimo ayay latageen. Xaaska Dajane ayaa sidoo kale sheegtay inay waydiiyeen warqad maxkamadeed balse ayna wax warqad ah tusin. Xaaska Dajane ayaa sidoo kale xustay in dawladii hore ay xidhi jirtay ninkeeda balse ay usoo goyn jirtay warqad maxkamadeed beenba ha ahaatee.
Murti Media Q/R: Abdinasir Magool
Comments
Post a Comment