Skip to main content

MJ DeMarco waa ganacsi-aasaase millionaire ah wuxuuna qoray buug la yidhaa: The Millionaire Fastlane: Crack the Code to Wealth and Live Rich for a Lifetime

MJ DeMarco waa ganacsi-aasaase millionaire ah wuxuuna qoray buug la yidhaa: The Millionaire Fastlane: Crack the Code to Wealth and Live Rich for a Lifetime
Qoraagu wuxuu buuggan faah-faahin kaga bixiyay sidu ku noqoday millionaire isagoo nolosha ka bilaabay meel hoose. Waxa kaluu buuga ku soo jeediyay talooyin aad u fiican oo ku saabsan horumarka iyo ganacsiga oo qof-kasta ku dabaqi karo noloshiisa.
Qoraagu wuxuu kusoo koray magaalo maraykanka ku taal wuxuuna ka dhashay qoys aan wax badan haysan. Beriguu yaraa ayuu maalin arkay nin dhalinyaro ah oo wata baabuurka qaaliga ah ee loo yaqaan Lamborghini. Maalintaas ayuu qoraagu go’aansaday inuu taajir noqodo intuuna gaboobin.
Hase-yeeshee, markuu koray nolol adag buu la kulmay waxaana qasab ku noqotay inuu ka shaqeeyo shaqooyin hoose oo nadaafada ku saabsan. Hadana marnaba kamuu tanaasulin riyadiisi taajirnimo. Had iyo jeer wuxuu ka fakari jiray siduu maruun uga hoos bixi lahaa shaqooyinkan dawaamka ku xidhan ee maamule laga amar qaadanayo.
Ka dib qoraagu wuxu galay dhawr sano oo dadaal iyo wax-isbarid. Dhawrkan sano wuxuu sameeyay tijaabooyin kala duwan oo ganacsi ah oo qaar badan ka fashilmeen. Laakin ugu danbayntii, shirkad uu aasaase oo u najaxday ayuu sii iibiyay kana helay lacag badan. Tani waxay u saamaxday inuu shaqada ka fadhiisto (retire) isagoo ah taajir dhawr iyo sodon jir ah.

Taajirnimo maxay faaido leeday?

Taajirnimo faaidodeeda ugu weyn waa xorriyad. Markaad heer taajir gaadhid waxaad helaysaa fursad aad waqtigaaga sidaad rabtid u maamushid adoon cidna ka qaadan idan ama ogolaansho. Inaad waqtigaaga xor u noqotidna waa waxyaabaha ugu qaalisan nolosha.

Jidka gaabiya ee taajirnimada

Waxa caalamka badankii caado ka noqotay in qof-ka raba inuu nolosha ku najaxo marka hore jaamacad ka baxo hadana shirkad ama dawlada u shaqo tago mushaharkiisana urursado.Hadhow markuu shaqada ka fadhiistana wixii uu hore u dhigtay ayuu ku raaxaysanayaa. Laakiin, dariiqan hadaad xataa ku guulaysatid waxaad midhihiisa dhadhamin doontaa goor ay noloshaadu gabal-dhac marayso! Qoraagu dariiqan wuxuu u bixiyay jidka gaabiya (The slow Lane), wuxuuna ku leeyay, jidka gaabiya uuma fiicna himiladaada in kastoo dad badani kuu xayaysiin doonaan. Dadka haysta jidka gaabiya waxay caadaysteen shaqooyinkooda dawaamka ah waxayna u noolyiin maalmaha fasaxa ah ee usbuuca (the weekend) ayaamaha kalena shaqo ayna jeclayn bay u adkaystaan.

Jidka dhaksaha badan ee taajirnimada

Dhinaca kale, qoraagu wuxu qeexay dariiqa uu isagu ku taajiray uuna bixiyay jidka dhakhsaha badan (The fastlane). Hadaba jidka ugu dhakhsaha badan ee taajirnimadu waa inaad noqotid ganacsi-aasaase. Hadaad ganacsi ku najaxdid waxaad taajir noqon kartaa adoon wali gaboobin. Laakiin ogow, jidka dhakhsaha badan wuxuu u baahanyay dadaal iyo daacadnimo. Qoraagu laftigiisa waqti bay ku qaadatay inuu shirkadiisa dhiso oo millionaire noqdo.

Kala saar waqtigaaga iyo dakhligaaga

Dadka shaqeeya badankood dakhliga soo galaa wuxuu ku xidhanyay tirada waqti ay shaqeeyaan (saacadaha, maalmaha ama usbuucyada). Laakiin maadaam uu waqtigaad shaqayn kartid xadidanyay, waqtigaagu seetuu ku yahay dakhligaaga. Dhinaca kale, ganacsi-aasaasuhu markuu ganacsiga ku najaxo dakhligu ka maalo kuma xidhna waqtigu galiyay. Ganacsiga marka si sax ah loo dhiso wuxu noqonayaa sida machine is-wada oo kaaga baahanuun inaad dhusha ka maamushid. Markaad heerkaa gaadhid waqtiguu kaaga baahanyay wuu sii yaraanayaa kolba, isagoo dakhliga kasoo galaana sii kordhayo! Heer waxaad gaadhi kartaa uu ganacsigaagu kuu shaqaynayo adoo madcam-ka iskaga qadaynaya, adoo dalxiisaya iyo waliba adoo hurda! Markaa qoraaga buuggani wuxuu kugula talinayaa inaad ka baxdid dadka waqtigooda loogu badalo mushahar ood noqotid qof waqtigiisa iyo dakhligiisu kala madaxbanaanyiin. Dadka shaqooyinka dawaamka caadaystay waxay u arkaan waqtiga wax badan oo si fudud loo bixin karo halkuu ganacsi aasaasuhu u arko waxa ugu qaalisan ee uu haysto.

Sidee ganacsi-aasaase loo noqodaa?

Qoraaga buuggani wuuxu soo bandhigay talooyin aad uu faaido badan oo ku saabsan habka ganacsi-aasaase loo noqodo:
  1. Marku ugu horaysa waa inaad u fakartid sida wax soo saare (producer). Hadaad u fiirsatid: badeecad kastood gadatid iyo adeeg kastood isticmaashid dad kula mid ah baa sameeyay. Hadaad rabtid inaad ganacsi-aasaase naajix ah noqotid waa inaad go’aansatid inaanad waligaa ahaanuun macmiil (consumer) ee aad noqotid wax soo saare (producer). Markaad sida wax soo sare u fakartid waxaa kuu muuqan doona fursado ganacsi oo kaa qarsoonaa.
  2. Sirta guushu kuma jirto fikrada ganacsi eed haysatid ee waxay ku jirtaa habkaad u fulisid fikradaas. Inuu ganacsigaagu najaxo iyo in kale waxay ku xidhantay habkaad fikradaada u fulisid.
  3. Hadaad ganasi-aasaase noqonaysid waad inaad dhistid cilmigaaga ku saabsan maaliyada.
  4. Fikrad kaliya dooro oo iyada fulinteeda xoogga saar oo marba fikrad ha ku boodin.
  5. Ka foggow ganacsiga cid kasta bilaabi karto waayo saaxadaas waxa ka jira tartan culus.
  6. Markaad ganacsi dhisaysid ogow inaad dhisaysid magac iyo sumcad.
  7. Ugu dambayn, macmiishaada ilaali oo faaido iyo adeeg waanaagsan ha kaa helaan.

Gabagabo

Way kugu jirtaa karti aad ku noqdotid ganacsi-aasaase taajir ah. Laakiin marka hore waa inaad caqliyada wax soo saaraha qaadatid kuna tala gashid inaad ka xorowdid shaqooyinka dawaamka ah. Dad badan baa ku riyooda inay ganacsi-aasaase noqdaan laakiin waxa la hadha caadooyin yar-yar oo horumarkooda u daran. Tusaale ahaan, dad badani waxay u maleeyaan inay waxbarashadu dhamaato maalintay jaamacada ka qalin-jabiyaan, halkay dadka ganacsiga ku horumaray ay ogyiin inayna waxbarashadu waligeed istaagin.
Ugu dambayn, jidka taajirnimadu wuu kuu furanyay hadaad ka gudbi kartid cabsidaada.

Cabdicasiis abiib mohamuud

Comments

Post a Comment

Popular posts from this blog

Cafisku waa qayb kamida caafimaadka aadanaha W/Q cabdicasiis Abiib mohamuud

Cafisku waa shey qaali ah waa wax loo baahan yahay in laysa saamaxo oo lays cafiyo waayo cafiska waa qeyb kamid ah nolosha baniaadanka. Cafiskana wuxuu lug ku lee yahay jaceylka waayo qof aan waligii wax saamixin ama cafin wax ma jeclaado.haddaad saamaxdo dadka waxay ahaanayaan kuwo ku leh oo mar walba kugu tashada. Soomaaalida waxay tiraadaa JACEYLKU WUXUU KU NOOLAADAA BIXIN IYO CAFIS NAFTUNA WAXAY KU NOOLAATAA HELID IYO ILOWSHO sidaa ay tahay waxaa yar dadka maantay wax cafiya waa dadka maantay iskuma kalsoona mana aaminsano ereyga cafis waxa uu yahay. Cafiska ama saamaxa waa qeyb kamid ah naxariista waaayo in lays cafiyaa xitaa dhanka diinta waa ay ka banan tahay, hadaba raaac qodobadaan soo socda sida aad u baratid cafiska waxa uu yahay iyo si aad u saamaxdo saaxiibtaa ama saaxiibkaa qalad kaa galay. 1. Cafiska wuxuu dhaqaa ama meyraa qalbi bani,aadan wuxuuna cusbooneysiiyaa jaceylka. 2. Cafiska waa midka horseeda nabada, jaceyl iyo wuxuu isku furaa qalbiyada labo ...
Post a Comment
Read more

8 Qodob Oo Kaa Dhigaya Qof Farxad Badan

Waxa had iyo jeer dadku raadiyaan in ay ku noolaadaan, nabad, nimco iyo farxad. Iyo in ay ka baxaan baahida ay qabaan ha ahaato mid dhaqaale, mid caafimaad iyo mid kalaba. Hadaba waxa jira dad haysta nolol fiican laakiin ay hadana dareemayaan in ay wax ka maqan yihiin. Si uu qofku u noqdo mid faraxsan kuna nool niyad wanaagsan ayaa waxa aanu qormadeena maanta kusoo qaadanaynaa 8 qodob oo aad ku heli kartid farxada niyada.1. Ku raaxayso nolosha xilyada fiican ee aad ku jirto. Dib u xusuuso xiliyadii wanaagsanaa ee ku soo maray, warqad ku qor oo akhri si aad u xusuusatid waqtigaas marka aad dareemayso niyad jab. 2. Hawl badan oo waqti badan kaa galo wax kasta waad ku gaadhi kartaa. Waxa aad meel ku qortaa 3 arimood oo aad muhiim kuugu ah oo aad rabtid in aad gaadhid iyo sida aad rabtid in aad ku gaadho. 3. Naftaada dhaqaalee. Samayo xili aad ku nasato sida adiga oo fadhiisanaya meel xeeba ah hawo macaan ka dhacayso. Waqti la qaado qoyskaaga ama saaxiibadaa. Qosolka iyo ilko cadayn...
Post a Comment
Read more

Shirkii Qiimaynta waxqabadka gobolada iyo degmooyinka deegaanka oo furmay.

(tuli-guuleed news) jumce, 27ka April , 2018.Waxaa    magaalada jigjiga ee caasimada deegaanka gaar ahaan madasha shirarka    kaali 2aad ee xarunta madaxtoooyada    DDSI    ka furmay shirkii qiimaynta waxqabadka gobolada degmooyinka iyo maamul magaalooyinka DDSI Haddaba, shirkan qiimaynta ah oo diirada lagu saarayo fulina qorshayaasha   horumarineed, nabadgalyo iyo maamulka suuban  ee u yaalay gobolada, degmooyinka iyo maamul magaalooyinka DDSI khaasatan qorshaha beer,biyaha, caafimaadka  ee baabaca (BBC) ayaa waxaa hogaaminayay  madaxwaynaha DDSI Mudane Cabdi Maxamuud Cumar,   afhayeenka golaha xildhibaanada DDSI ahna madaxa arimaha xisbiga ee  xarunta dhexe ee XDSHSI mudane Maxamedrashiid Isaaq  iyo  madaxwayne ku xigenka DDSI ahna wasiirka horumarinta beeraraha iyo khayraadka dabiiciga ah marwo Sucaad Axmed Faarax warkan oo faah-faahsan warakayaga dambe ayaad kala socondoontaan.
Post a Comment
Read more